Monday, December 04, 2006

કલંક

મારા ગર્ભના પોલાણમાં
પ્રસરી રહ્યું છે
વેરાન રણ

લીલાછમ્મ થવા મથતાં
મારા સ્ત્રીત્વને
નિર્મૂળ કરી દે છે
એનો ભૂખાળવો ઝંઝાવાત

પણ
મને તો ગમે છે
ભૂરાંભમ્મર ઝાંઝવા
અને
પ્રસવની પીડા પણ

એથી જ
અવતારું છું
રોજ
એકાદ-બે ઝાંઝવાં

કલંકોને ધોતી રહું છું
એ રીતે...

Monday, July 31, 2006

શોધ

વરસાદમાં ઝબકોળાયેલા
શહેરની વચ્ચે ઊભો છું
હું--
કોરોકટ્....
મારા હિસ્સાનું આકાશ તો
પોતાની પાંખોમાં સમેટીને લઈ ગયું છે કોઈ
પંખી.
હથેળીમાં થીજેલું વાદળ લઈ
હું
ભટક્યા કરું છું
હવે
મારા હિસ્સાના સૂર્યને
શોધવા...

Tuesday, July 11, 2006

સંબંધ

સંબંધની
બટકણી ડાળ પરથી
ખરતાં રહ્યાં
મારાં સપનાઓ
એક પછી એક...
હવે
થાક લાગે છે
નવા ફળદ્રુપ પ્રદેશની શોધમાં
ભટકવાનો...

Monday, July 10, 2006

સવાર

સવાર
એટલે
તકિયાને
તકિયા તરીકે
સ્વીકારી લેવાનો સમય...

Saturday, July 01, 2006

સંહાર.....

રાતનો આસવ ઘોળી
ચકચૂર,
અલ્લડ,
બેફામ..
મારી પાંપણોનાં દ્વાર તોડી
અતિક્રમે
તારી સ્મૃતિ-
સંહાર એની પ્રકૃતિ
સુંવાળા સ્વપ્નોનો સ્વાંગ રચી
મને ભરમાવે
ને પછી પોતાના વિકરાળ પંજાથી
મને ચૂંથ્યા કરે
રાત આખી-
આખરે જંગ જીતે
ને
મારા અસ્તિત્વના પરાજિત ગઢ પર
લહેરાવે
વિજય-પતાકા
સવારે હું શ્વેત ચાદરમાંથી
સમેટું
મારી સ્વસ્થતાના
કણસતાં ટુકડાઓ...

Thursday, June 29, 2006

મૌન


તારા મૌનનો પહાડ
લાંઘું એટલો વધે ...

મોતી...

તારી નફરતના
અતલ દરિયામાં
ગોતા મારી,
જો !
હું સમજણનું મોતી ગોતી લાવ્યો ...

Wednesday, May 31, 2006

છેવટે...


વાસ્તવિકતાના કાળમીંઢ પાષાણો
અને
મારા સ્વપ્ન સાગરના ઉન્મુક્ત
મોજાંઓ...
છેવટે તો
નર્યાં ફીણ ...

મારો પરિવાર..


મારો પરિવાર એટલે
સાંજ...
દરિયો...
રેતી...
ઉદાસી...
અને
હું...

Tuesday, May 30, 2006

તરસ..


મારી જીવલેણ તરસની ચરમસીમા
અને
તારા પ્રતિભાવનું એક બુંદ....
જાણે આખું જીવન તર-બતર !

Friday, May 26, 2006

યુદ્ધ..


કાળી રાતની યુદ્ધ-ભૂમિ પર
તારા સ્વપ્નોની સેનાએ મારી નિઃશસ્ત્ર ઊંઘ પર હલ્લો કર્યો..
મારી ઊંઘનું સામ્રાજ્ય તહસ-નહસ...
ને
તારી યાદની કાળ-કોટડીમાં
હું બંદીવાન સમ્રાટ...